وفاقی وزیر مذہبی امور چوہدری سالک حسین نے سعودی عرب پہنچنے کے بعد پاکستانی عازمین حج کے لیے انتظامات کا جائزہ لیا اور بہترین سہولیات کی فراہمی پر خادم حرمین شریفین شاہ سلمان اور ولی عہد محمد بن سلمان کا شکریہ ادا کیا۔
چوہدری سالک حسین نے پاکستان حج مشن کے مختلف شعبہ جات کا دورہ کیا، جہاں انہیں اور سید عطا الرحمان کو حج آپریشن پر بریفنگ دی گئی۔ انہوں نے مدینہ حج مشن کے مین کنٹرول آفس میں کمپلینٹ مینجمنٹ سیل کا بھی دورہ کیا، جہاں ڈائریکٹر مدینہ ضیا الرحمان نے انہیں پاکستان حج مشن مدینہ منورہ کے بارے میں بریفنگ دی۔
اس موقع پر وفاقی وزیر نے کہا کہ عازمین حج کی شکایات کا بروقت ازالہ نظام کی کامیابی کی دلیل ہے۔ انہوں نے پاکستانی عازمین حج کے لیے مسجد نبوی کے قریب ترین رہائش گاہوں پر اطمینان کا اظہار کرتے ہوئے کہا کہ یہ پاکستانی حج مشن کی بڑی کامیابی ہے۔
وفاقی وزیر نے مزید کہا کہ پاکستانی حج مشن محنت، لگن اور دینی جذبے کے تحت عازمین حج کی خدمت میں مصروف عمل ہے، اور خادم حرمین شریفین شاہ سلمان اور ولی عہد محمد بن سلمان کے بہترین سہولیات کی فراہمی پر ان کے شکر گزار ہیں۔
